Plantun de Prouvènço

Pèr coumpara dos planto d'encò nostre

Potentilla supina & Crataegus azarolus

Potentilla supina

Rosaceae

Nom en français : Potentille couchée.

Descripcioun :
Lou fragoun-coucha, proun rare au nostre, se pòu rescountra au couchant de noste relarg, en ribo d'estang se o dins lou limas de ribiero. Es uno planto de l'an di proun ramificado que porto de pichòti flour jauno e noumbrouso, que lou pecou se viro après la flourido. Li fueio an de 9 à 3 partido. Apoundèn que li petalo, fragilo, soun pu courto que li sepalo. La planto èi marcado sus listo roujo categourìo LC, valènt à dire soucit minour.

Usanço :
Counneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 60 cm
Fueio : basalo
Tipe bioulougico : Emicriptoufite
Cicle bioulougico : Planto de l'an

Gènre : Potentilla
Famiho : Rosaceae

Ordre : Rosales

Coulour de la flour : Jauno
Petalo : 4
Ø (o loungour) flour : 3 à 4 mm
Flourido : Printèms - Estiéu

Sòu : Ca
Autour basso e auto : 0 à 400 m
Aparado : Noun
Mai à óutobre

Liò : Ribo d'estang se - Limas de ribiero
Estànci : Mesoumediterran
Couroulougi : Bourealo
Ref. sc. : Potentilla supina L., 1753

Argeiroulié

Crataegus azarolus

Rosaceae

Àutri noum : Argeroulié, Poumetié.

Nom en français : Azarolier.

Descripcioun :
L'argeiroulié èro proun planta à passa tèms proche dis oustau. Aro se n'en vèi d'eici, d'eila en ribo de champ e dins lis anciàni sebisso. Es un aubret un pau mai fort que l'acinié amé d'espinasso ; li ramo soun mens sarrado mai pus espesso. Flouris à la debuto de la primo e douno de fru roujo à l'autouno que ié dison lis argeirolo vo poumeleto.

Usanço :
"Qu vau d'argeirolo ?", èro la crido di marchand à Marsiho, coume lou raporto F. Mistral dins lou TdF. Aquéstis argeirolo an un goust que sèmblo un pau lou de la poumo e èron bèn mai manjado à passa tèms qu'à l'ouro d'aro. Es un fru de descurbi tourna-mai. Li fru e li fueio an li mémi prouprieta que l'acinié, estènt riche en anti-óussidant.